Negozio ereduak sortzeko beste modu bat
Badira jada urte batzuk Team Academy Euskadiko ofizinak utzi genituela, baina hala ere, oraindik mantentzen ditugu bertan jasotako ohitura batzuk. Bilerak antolatzeko modua, check-in-ak, hiruhilabetean behin egiten ditugun seminarioak… Liburuak irakurtzea ere ezinbestekoa zen garai hartan, eta liburuak praktikan jartzea, noski.
Udara baino lehen, erronka bat jarri genion geure buruari: hilabetean behin “Ikasteko eta Ikasitakoa elkarbanatzeko” bilerak antolatzea. Gainera, gaur izan dugu lehenengo bilera. Gustora egon gara, desberdina izan da. Gure asmoa ikasitakoa geure artean banatzeaz gain, zuekin ere blog honen bidez partekatzea da. Gaurkoan duela hilabete batzuk irakurritako liburu bati buruz berba egin nahi dizuet: Business Model Generation (Alexander Osterwalder & Yves Pigneur).
Erakargarria eta irakurterraza da liburua. Motzean esanda, negozio ereduei buruzko analisira eta hausnarketara gonbidatzen gaituen liburua da. Liburuan aurkezten den erreminta nagusia web orrian bertan deskargatu dezakezuen Canvas-a da. Bederatzi bloketan banatutako canvas honek, negozio eredu orok balioa sortzeko, banatzeko eta jasotzeko moduetan hausnartzera bultzatzen gaitu.
Hainbat tailerretan erabili izan dugu erreminta hau. Tecnalia-rekin elkarlanean egindako FITA proiektuan eta baita Leioako Behargintzarekin batera egindako negozio ideien tailerrean ere. Batzuetan, mila lerro idaztea baino hobe da irudien bitartez ikustea. Hona hemen liburua laburbiltzen duen bideo interesgarri bat.
